Okap: Ban’m bay nou yon ti kras limyè sou dènye visit prezidan peyi a, mouche Jomo, nan depatman nò a!

Okap, https://www.lemiroirinfo.ca, Mardi 21 Juillet 2020

Prezidan debake nan vil la, akonpanye sekirite’l yo ame jouk nan dan pou fè moun pè pa pwoche mouche a (se vre gen kowonaviris, men, pèp la te ka kanpe nan distans). Vil la fè nwè kon fou, sal kon peny tidan. Alòs ke prezidan ap fè chèlbè nan bay repons jan’l vle ak kèk jounalis ki te la nan yon konferans pou laprès ke’l t’ap bay. Prezidan mache bay blag nan menm okasyon pasaj li an.

Se msye direktè levasyon nan nò peyi a ki bay prezidan Jojo lapawòl, mouche Kètis Ema. Direktè a mete tou 2 vye chapo’l yo an menm tan : Chapo respond levasyon nan depatman an ak lòt chapo jounalis li a. A vrè di, li pat ka jete dezyèm nan ki pèmèt ke’l twouve’l nan pòs sa.

Èske se sèl yon konferans pou laprès ki ta dwe bay?

Men kèk remak enpòtan pou’n fè ak gade ansanm :

1- Lameri Okap pa reprezante. (pa bliye, pouvwa lokal yo dwe mache tèt kole ak pouvwa santral la pou pèmèt devlopman fèt tout bon vwe nan komin yo, ak rès peyi.)

2- Delegasyon nò a pa di yon myoud. (Yon delege, se je ak zòrèy egzekitif la nan sa ki gen awè ak zafè administrasyon piblik ak koze politik. Kidonk, li jwe yon gwo wòl nan fè mache pwogram gouvènman an nan depatman yo. Olye se mouche levasyon an ki te bay prezidan pale, se delege a ki ta dwe fè’l.)

3- Komisè gouvènman an pa fè kenn siy vi. (N’ap raple ke komisè gouvènman an se je ak zòrèy egzekitif la nan koze Jistis nan depatman an. Valè deblozay ki gen nan lajistis vil la, komisè gouvènman depatman nò a, te dwe pwofite sitiyasyon an pou’l te fè yon ti pale an piblik kòm demonstrasyon ak prezidan an.)

4- Direktè lapolis nan depatman nò an, rete lakay li ap bay blag ak fanmi li, pandan l’ap ri tankou anpil moun, prezidan Repiblik la ki gen jany sou bèl ak gwo kesyon jounalis Richa Pyè, PDG « Mapou Info » te poze’l yo. (Ò, chèf polis yo nan depatman nò a, se je ak zòrèy egzekitif la nan matyè sekirite piblik. Donk li ta dwe la, menm pou’l te montre prezidan ke l’ap travay tout bon pou’l tabli sekirite nan depatman an tankou jan pouvwa ap mache klèwonnen sou tout teritwa nasyonal la.)

5- Elatriye.

Nou vle mande :

a) Èske otorite lokal yo pa danse kole ak prezidan an, osinon, prezidan Repiblik la pa fè yo konfyans?

b) Èske se koze pwotokòl yo pa konnen, dimwens, yo fè ekspre pa mete yo anpratik?

c) Poukisa prezidan Jojo aji konsa?

d) Èske vrè pwoblèm depatman nò an te poze nan moman sa?

e) Diktati bout di ou inyorans?

f) Elatriye.

Nou paka fè peyi nan emosyon ni nan pa konnen sa n’ap fè. Se pa sak pa konnen ki dirije yon peyi, men se lasyans ak Konsyans ki pou makonnen ansanm pou devlope peyi a. Pèp la dwe pran fòm kòl pou’l rale kòl anba tout piyajè ak magouyè k’ap piye peyi a depi dikdantan.

Auteur: Delcarme BOLIVARD !

%d blogueurs aiment cette page :